Monte Xalo

A poucos minutos da Coruña, o Monte Xalo esconde centos de lugares para coñecer o patrimonio histórico e cultural, pero tamén natural, dun enclave máxico. A aplicación do Monte Xalo é un proxecto da Asociación Cultural Castelo Conta e a Comunidade de Montes Veciñais de Castelo que permite adentrarse nos segredos dun lugar máxico, que é tamén o gran pulmón verde da comarca das Mariñas, na Coruña. Logo de anos de traballo na recollida do patrimonio histórico, cultural e natural deste lugar, da man das veciñas e veciños das distintas parroquias e aldeas que conforman o Monte Xalo, coa aplicación é posible acceder a decenas de puntos divulgativos relacionados coa arquitectura, as augas, as pedras ou a flora e fauna do lugar. Tamén permite explorar diferentes rutas, e coñecer todos os servizos cos que programar unha visita turística inesquecible a calquera punto do monte.