eKosova vs Kuleta Digjitale

Platforma e shërbimeve elektronike e-Kosova është sportel elektronik, përmes të cilit çdo person i interesuar mund të marrë nëpërmjet internetit shërbime elektronike që ofrohen nga institucionet publike në Kosovë, duke shkurtuar distancën, rritur efikasitetin dhe shpejtësinë e marrjes së shërbimit. Platforma eKosova, menaxhohet dhe administrohet nga Agjencia e Shoqërisë së Informacionit. Disa informatat rreth e-Kosova: - Është dritarja e vetme nëpërmjet së cilës ofrohen në mënyrë elektronike shërbimet e institucioneve publike; - Ofron shërbime publike 24/7/365; - Ofron shërbime elektronike të standardeve më të fundit të teknologjisë; - Ofron mundësi për kryerjen e pagesave “Online” për shërbime, nëpërmjet kartave të debitit dhe kreditit, pavarësisht klient i cilës bankë jeni; - Ofron informacione për shërbimet elektronike lidhur me procedurën dhe dokumentet e nevojshme për marrjen e shërbimit; - Është në përputhje të plotë me politikat e sigurisë kibernetike për mbrojtjen e të dhënave të përdoruesve; - Ofron mundësi komunikimi për çdo paqartësi, pyetje apo problem mbi regjistrimin, shërbimet e ofruara në eKosova, përmes forumit të platformës, postës elektronike, komenteve dhe mesazheve në rrjetet sociale.

Kuleta Digjitale nuk është thjesht një aplikacion - është një hap drejt një qyteti të përparuar, një portë moderne për të ardhmen digjitale të Prishtinës. E ndërtuar me përkushtim për qytetarët e kryeqytetit, Kuleta Digjitale sjell një transformim rrënjësor në mënyrën se si shërbimet publike ofrohen dhe përjetohen. Qoftë blerja e biletave për autobus me një prekje të vetme, menaxhimi i parkimit në kohë reale, apo pagesa e shpejtë dhe e sigurt e shërbimeve komunale - gjithçka është e përmbledhur në një platformë të vetme, elegante dhe të avancuar. Kuleta Digjitale nuk është vetëm lehtësi - është standardi i ri i jetesës urbane në Prishtinë.